ભાવનગર ખાતે સિપાઈ સમાજના ૪૧૧ વિદ્યાર્થીઓને કરાયા સન્માનિત કરાયા સાથે સાથે ૫૪ બોટલ બ્લડ એકત્રિત કરવામાં આવ્યું.
હુસામુદ્દીન કપાસી દ્વારા જસદણ
વર્ષ ૨૦૧૫ થી મુસ્લિમ સિપાઈ સમાજમાં શૈક્ષણિક ઉત્થાન માટે કામ કરતી એક માત્ર સંસ્થા એટલે સિપાઈ સમાજ ટ્રસ્ટ ગુજરાત દ્વારા ભાવનગર ખાતે છઠ્ઠો સન્માન સમારોહ યોજ્યો હતો.
જેમાં ગુજરાતના અલગ અલગ ગામો માંથી આવેલા ૪ દિવ્યાંગ ખેલાડીઓ, ૨ સાંસ્કૃતિક પ્રવૃત્તિઓમાં જિલ્લા લેવલે વિજેતા થયેલ યુવાઓ, ૫ અલગ અલગ રમતોમાં જિલ્લા લેવલે સન્માનિત થયેલ ખેલાડીઓ, ૩ દિવ્યાંગ વિદ્યાર્થીઓ તેમજ ધોરણ ૮ થી ઉચ્ચ અભ્યાસ કરતા ૩૯૪ વિદ્યાર્થીઓ અને ગુજરાત તથા ભારત સરકારના અલગ અલગ ખાતાઓમાં સરકારી નોકરી મેળવેલ ૩ યુવાઓને સન્માનિત કરાયા હતા.
આ સન્માન સમારોહ પ્રસંગે કાર્યક્રમ પહેલા સવારે સિપાઈ સમાજ ટ્રસ્ટ ગુજરાત અને ઇન્ડિયન રેડ ક્રોસ સોસાયટી સંચાલિત રેડ ક્રોસ બ્લડ બેંક ભાવનગરના સંયુક્ત ઉપક્રમે એક રકતદાન શિબિરનું આયોજન કરવામાં આવ્યું હતું.
જેમાં સિપાઈ સમાજ ટ્રસ્ટના કારોબારી સભ્યો તથા સન્માન સમારોહમાં આવેલ મહેમાનોએ હોંશે હોંશે ૫૪ બોટલ બ્લડ ડોનેટ કર્યું હતું જે બ્લડ ભાવનગર ખાતેની બેંકને અર્પિત કરાયું હતું. આ બ્લડ ડોનેશન કેમ્પની જવાબદારી સિપાઈ સમાજ ટ્રસ્ટના સુરેન્દ્રનગરના કાર્યકર રાજનભાઈ નાયક તથા સાથી મિત્રોએ ઉપાડી હતી.
સિપાઈ સમાજ ટ્રસ્ટ ગુજરાત દ્વારા ભાવનગર ખાતે આયોજીત સન્માન સમારોહમાં આ વર્ષે પહેલી વાર રાહતદરે ફૂલ સ્કેપ ચોપડા અને બોલપેનનું વિતરણ પણ કરવામાં આવ્યું હતું જેનો ભરપૂર લાભ સન્માન સમારોહમાં આવેલ વિધાર્થીઓએ લીધો હતો. જેનું સંચાલન સિપાઈ સમાજ ટ્રસ્ટના જસદણના શિક્ષણ વિભાગના કાર્યકર રફીકભાઈ ચૌહાણ, રાણપુરના ઇલ્યાસભાઈ બેલીમ અને પાલીતાણાના અનીસભાઈ કાજી એ કર્યું હતું.
સિપાઈ સમાજ ટ્રસ્ટના આમંત્રણ ને માન આપીને ગુજરાત ભરમાંથી સિપાઈ સમાજ ટ્રસ્ટ ના દાતાઓ ,આગેવાનો તથા અલગ અલગ ગામની ૪૦ થી વધુ જમાતના પ્રમુખ અથવા આગેવાનો,શિક્ષણ વિદો ખાસહાજર રહિ વિદ્યાર્થીઓ ને પ્રોત્સાહિત કર્યા હતા.અને વિદ્યાર્થીઓને શિક્ષણ ક્ષેત્રે ખુબ મહેનત કરી આગળ વધી પોતાના. કુટુંબ,સમાજ તથા દેશનું નામ રોશન કરવા પ્રેરીત કર્યા હતા
ભાવનગર ખાતે યોજાયેલ આ સન્માન સમારોહમાં ગુજરાત ભરમાંથી ૧૦૦૦ થી વધુ લોકો જોડાયા હતા જેમાં દૂર દૂર થી આવતા લોકો માટે રાત્રે પણ સુવા તથા જમવાની વ્યવસ્થા કરવામાં આવી હતી.બહારગામથી આવેલા મહેમાનો માટે બપોરે જમવાની પણ વ્યવસ્થા કરવામા આવી હતી.આ સમગ્ર કાર્યક્રમને સફળ બનાવવા સિપાઈ સમાજ ટ્રસ્ટના પ્રમુખ ડો. અવેશ ચૌહાણ (પોરબંદર) સહિતના ગુજરાત ભરના કાર્યકરોએ જહેમત ઉઠાવી હતી.
