ચૂંટણી ટાણે દારૂની હેરાફેરી:રાજકોટમાં ગુંદાળા પાટીયા નજીક ટ્રકમાંથી 449 પેટી વિદેશી દારૂનો જંગી જથ્થો ઝડપાયો
ગુજરાતની ચૂંટણીમાં મતદાનની તારીખ નજીક આવી રહી છે તેમ તેમ બિનહિસાબી નાણા અને દારૂનો જથ્થો મોટી સંખ્યામાં ઝડપાઈ રહ્યો છે. સુરતમાં લાખોની કેશ ઝડપાઈ હોવાના અહેવાલ બાદ રાજકોટમાં એરપોર્ટ પોલીસે મોટી કાર્યવાહી કરતા ગુંદાળા પાટીયા નજીકથી 449 પેટી વિદેશી દારૂનો જથ્થો ઝડપી પાડ્યો હતો. પોલીસે કુલ 5,388 બોટલ વિદેશી દારૂનો જથ્થો પકડ્યો હતો અને કુલ રૂ.31 લાખના મુદ્દામાલ સાથે ટ્રક ડ્રાઇવરની ધરપકડ કરવામાં આવી હતી તેમજ તેની પૂછપરછ હાથ ધરવામાં આવી છે.
- ટ્રકમાં વિદેશી દારૂની હેરાફેરી
આ અંગેની પ્રાપ્ત વિગતો અનુસાર એરપોર્ટ પોલીસ સ્ટેશનના પોલીસ કર્મીઓ બામણબોર ચેક પો.સ્ટથી આગળ ગુંદાળા ગામના પાટીયા ખાતે વાહન ચેકીગમાં હતા તે દરમ્યાન પો.કોન્સ મહાવીરસિંહ ચુડાસમાને ચોક્કસ બાતમી મળી હતી કે અમદાવાદ-રાજકોટ નેશનલ હાઇવે રોડ ગુંદાળા ગામના પાટીયા પાસે આરોપી સાગારામ મુલારામ કડવાસરા ટ્રકમાં વિદેશી દારૂની હેરાફેરી કરશે. જેને પગલે પોલીસે ઘટના સ્થળે વોચ ગોઠવી હતી. જ્યાં ટ્રક પસાર થતા પોલીસે તેને અટકાવ્યો હતો. જેમાં મૂળ રાજસ્થાનનો વતની ટ્રક ડ્રાઈવર સાગારામ મુલારામ કડવાસરા મળી આવ્યો હતો અને પોલીસ દ્વારા ટ્રકની તલાશી લેતા તેમાં વિદેશી દારૂ ભરેલી 449 પેટી મળી આવી હતી જેમાં અલગ અલગ કંપનીઓની વિદેશી દારૂની 5,388 બોટલનો જથ્થો ઝડપાયો હતો. હાલ પોલીસે ટ્રક અને દારૂ સહિતના રૂ.31 લાખના મુદ્દામાલ સાથે ટ્રક ડ્રાઇવરની ધરપકડ કરીને કાયદેસર ની કાર્યવાહી હાથ ધરી છે.
- દારૂની 3767 બોટર જપ્ત કરી
ઉલ્લેખનીય છે કે રાજકોટ પોલીસે 3 નવેમ્બરથી 21 નવેમ્બર સુધીમાં દારૂની હેરાફેરી સામે કાર્યવાહી કરતાં, રૂ.12,23,425ની કિંમતનો 3767 બોટલ (2021 લીટર) વિદેશી દારૂ જપ્ત કર્યો છે. જ્યારે રૂ.55,590ની કિંમતનો 2780 લીટર દારૂ જપ્ત કર્યો છે. 58 શખ્સોને તડીપાર કરાયા છે, જ્યારે 57 શખ્સોની પાસા હેઠળ અટકાયત કરવામાં આવી છે. જ્યારે 934 શખ્સો સામે અટકાયતી પગલાં લેવામાં આવ્યા છે. પોલીસે દારૂના ગુનામાં નાસતા ફરતા 10 આરોપી તથા ગંભીર ગુનામાં સંડોવાયેલા 20 આરોપી મળી 30 જેટલા આરોપીને ઝડપી લીધા છે. એન.ડી.પી.એસ. અંતર્ગત પોલીસે આશરે રૂ.1,71,100ની કિંમતનું 17.11 ગ્રામ મેફી ડ્રોન ડ્રગ્સ જપ્ત કર્યું છે. ચેકપોસ્ટ પર તહેનાત પોલીસ સ્ટાફે દારૂ પીને વાહન ચલાવવાના ગુના અંતર્ગત 28 કેસ કર્યા છે, જ્યારે જાહેરનામા ભંગના 71 કેસ કર્યા છે. આ સમગ્ર કામગીરી આશરે 1400 જેટલા પોલીસ અધિકારીઓ, કર્મચારીઓ દ્વારા કરવામાં આવી છે.
- પોલીસે 12 હજારથી વધુ લોકો પર અટકાયતી પગલાં લીધા
ગુજરાત વિધાનસભા ચૂંટણીને લઈને રાજકોટ જિલ્લામાં ચૂંટણી પ્રક્રિયા શાંતિપૂર્ણ રીતે થઈ શકે તે માટે ગ્રામ્ય પોલીસ દ્વારા ચૂંટણી જાહેર થયાના 18 દિવસમાં 12,960 લોકો પર વિવિધ ગુના હેઠળ કાર્યવાહી કરવામાં આવી છે. જેમાં 20 નવેમ્બર દરમિયાન પોલીસ દ્વારા કરવામાં આવેલી કામગીરી અંગે વિગત આપતા જિલ્લા પોલીસ અધિક્ષક જયપાલસિંહ રાઠોડે જણાવ્યું હતું કે, ગંભીર ગુનાહિત ઇતિહાસ ધરાવતા 45 શખ્સ વિરુદ્ધ પાસા હેઠળ કાર્યવાહી કરવામાં આવી છે. તેમજ 115 જેટલા શખ્સને તડીપાર કરવામાં આવ્યા છે. જ્યારે સી.પી.સીની વિવિધ કલમો 107, 108 અને 110 હેઠળ 11,863 લોકો પર કાર્યવાહી કરવામાં આવી છે. પ્રોહિબિશન હેઠળ 937, જુગારધારાના 60 ઉપરાંત પ્રોહિબિશનના 554 કેસ કરવામાં આવ્યા છે.
- 2544 ધરપકડ વોરંટ બજાવવામાં આવ્યા
હાલ સમગ્ર જિલ્લામાં ચૂંટણી પ્રચારની કામગીરી ચાલી રહી છે. તેમજ આગામી 1 ડિસેમ્બરે મતદાન પ્રકિયા હાથ ધરવમાં આવશે, ત્યારે ગ્રામ્ય પોલીસ દ્વારા જિલ્લામાં શાંતિ અને સલામતી જળવાઈ રહે તે માટે પોલીસ બંદોબસ્ત સાથે પૂરતી તકેદારી રાખવામાં આવી રહી હોવાનું પોલીસ અધિક્ષકે જણાવ્યું છે. ચૂંટણી મુક્ત અને ન્યાયી વાતાવરણમાં યોજાઇ અને શહેરમાં કાયદો અને વ્યવસ્થા જળવાઈ રહે તે માટે રાજકોટ શહેર પોલીસ કમિશનર રાજુ ભાર્ગવના વડપણ હેઠળ તથા ખાસ પોલીસ કમિશનર સૌરભ તોલંબિયાના નિરીક્ષણમાં પોલીસ સ્ટાફ ખડેપગે ફરજ બજાવી રહ્યો છે. શહેરમાં દારૂ, માદક દ્રવ્યો તેમજ રોકડ સહિતની હેરાફેરી રોકવા શહેર ફરતે 9 ચેકપોસ્ટ પર સઘન ચેકિંગ કરવામાં આવી રહ્યું છે. શહેર પોલીસ દ્વારા ચૂંટણી જાહેર થઈ ત્યારથી એટલે કે 3 નવેમ્બરથી 20 નવેમ્બર સુધીમાં 2544 ધરપકડ વોરંટ બજાવવામાં આવ્યા છે. જ્યારે 2929 હથિયાર જમા લેવામાં આવ્યા છે.
- શહેરમાં 5882 શખ્સો વિરૂદ્ધ અટકાયતી પગલા
રાજકોટ શહેરમાં વિધાનસભાની ચૂંટણીને લઇ અનિચ્છનીય બનાવ ન બને અને ગુનાખોરી ઘટાડવા માટે પોલીસ કમિશનર રાજુ ભાર્ગવ અને જેસીપી સૌરભ તોલબિયાના માર્ગદર્શન હેઠળ અલગ અલગ પોલીસ મથકમાં અલગ અલગ ગુના કરવાની ટેવ ધરાવતા 33 જેટલા શખ્સોને પાસામાં ધકેલી દેવામાં આવ્યા છે, જ્યારે 60 જેટલા શખ્સોને રાજકોટ જિલ્લાની બહાર તડીપાર કરવામાં આવ્યા છે અને અગાઉ પોલીસ ચોપડે ચડી ચૂકેલા એવા કુલ 5882 જેટલા શખ્સો વિરુદ્ધ અટકાયતી પગલા લેવામાં આવ્યા છે.