વિંછીયા પોલીસને મળેલી ગુપ્ત માહિતીના આધારે ગુંદાળા ગામની સીમમાં આવેલી એક વાડીમાં દરોડો પાડવામાં આવ્યો હતો. આ દરોડા દરમિયાન મોટી માત્રામાં વિદેશી દારૂ મળી આવતાં ચકચાર મચી ગઈ હતી.
પોલીસે સ્થળ પર તપાસ કરતાં દારૂના જૂથ સાથે કુલ રૂપિયા 6,38,332/-નો મુદામાલ જપ્ત કર્યો છે. પ્રાપ્ત માહિતી મુજબ, આ વાડી પ્રવીણભાઈ શીવાભાઈ જોગરાજીયા નામના ઇસમના નામે હોવાનું જાણવા મળ્યું છે.
પોલીસે સ્થળ પર પહોંચી તત્કાલ તપાસ શરૂ કરી હતી, જોકે આરોપી ઘટના સ્થળેથી નાસી છૂટવામાં સફળ રહ્યો હતો. હાલ વિંછીયા પોલીસ આરોપીની શોધખોળમાં લાગી ગઈ છે અને તેની ધરપકડ માટે વિવિધ સ્તરે કાર્યવાહી હાથ ધરવામાં આવી રહી છે.
સ્થાનિક સ્તરે આમ મોટો દારૂનો જથ્થો મળવાથી બુટલેગિંગના રેકેટની આશંકા પણ વ્યક્ત થઈ રહી છે. પોલીસે આગળની કાર્યવાહી આરંભી છે અને આરોપીને ઝડપવા માટે ચક્રો ગતિમાન કર્યા છે.
