બોટાદ જિલ્લાના ગઢડામાં એક દુઃખદ ઘટના સામે આવી છે. ગઢડા પોલીસ મથકના 28 વર્ષીય કોન્સ્ટેબલ પ્રહલાદભાઈ રણજીતભાઈ બાવળીયાએ પોતાના ઘરે ફાંસો ખાઈને આપઘાત કર્યો છે.
ઘટનાની જાણ થતાં જ ગઢડા પોલીસ તાત્કાલિક ઘટનાસ્થળે પહોંચી ગઈ હતી. પોલીસે મૃતદેહને પોસ્ટમોર્ટમ માટે હોસ્પિટલ ખસેડ્યો છે. ઘટનાની ગંભીરતાને ધ્યાનમાં લેતા બોટાદના ડીવાયએસપી સહિતના ઉચ્ચ અધિકારીઓ પણ ગઢડા દોડી આવ્યા હતા.
પ્રાથમિક તપાસમાં આપઘાત પાછળનું ચોક્કસ કારણ જાણવા મળ્યું નથી. ગઢડા પોલીસે આ કેસમાં તપાસ શરૂ કરી છે. પોલીસ કોન્સ્ટેબલે કયા કારણોસર આ પગલું ભર્યું તે દિશામાં તપાસ ચાલી રહી છે. આ ઘટનાથી સમગ્ર પોલીસ બેડામાં શોકની લાગણી છવાઈ ગઈ છે.
મળતી માહિતી મુજબ તેઓ ધંધુકા તાલુકાના વતની છે. તેમની પત્ની સગર્ભા હોવાથી પીયર ગઇ હતી. આથી ઘરમાં એકલતાનો લાભ લઇ તેમણે આ પગલું ભર્યું. જો કે, આપઘાતનું કોઇ ચોક્કસ કારણ જાણવા મળ્યું નથી. ઉલ્લેખનીય છે કે, થોડા દિવસો બાદ તેમની સગર્ભા પત્નીનો ખોળો ભરાવવાનો હતો. જેને લઇને હાલ પત્ની અને પરિવાર શોકમગગ્ન બન્યો છે.
