બોટાદ જિલ્લાના લાઠીદડ ગામમાં ડુપ્લીકેટ બીડીનું વેચાણ થતું હોવાનો પર્દાફાશ થયો છે. ચારભાઈ બીડી કંપનીના પ્રતિનિધિ અને બોટાદ રૂરલ પોલીસે સંયુક્ત કાર્યવાહી કરીને લાઠીદડ ગામની એક દુકાનમાં તપાસ હાથ ધરી હતી. આ તપાસ દરમિયાન દુકાનમાંથી ડુપ્લીકેટ ચારભાઈ બીડીના 12 બાંધા મળી આવ્યા હતા.
પોલીસે તાત્કાલિક કાર્યવાહી કરતાં મુકેશભાઈ ચમનભાઈ જાખણીયાની અટકાયત કરી હતી. તપાસ દરમિયાન એ પણ બહાર આવ્યું કે, બોટાદમાં રહેતા ઈરફાનભાઈ શરીફભાઈ પણ આ ડુપ્લીકેટ બીડીના વેચાણમાં સંડોવાયેલા છે.
ચારભાઈ બીડી કંપનીના પ્રતિનિધિએ બોટાદ રૂરલ પોલીસ સ્ટેશનમાં બંને શખ્સો વિરુદ્ધ ફરિયાદ નોંધાવી છે. પોલીસે મુકેશભાઈ જાખણીયા અને ઈરફાનભાઈ શરીફભાઈ સામે ગુનો નોંધી વધુ તપાસ શરૂ કરી છે.
